«Bozdaqtar» kitaby qaıta  jaryq  kóredi

Barsha adamzat balasy úshin Uly Otan soǵysyndaǵy Jeńistiń orny aıryqsha. Aqmola óńirinde muń aralas merekeni óz deńgeıinde atap ótýge qatysty daıyndyq sharalary bastalyp ketti. Osyndaı taǵylymdyq-tálimdik sharanyń biri – «Bozdaqtar» kitabyn tolyqtyryp, tórimizge qaıta ozdyrý. Elimizdi jaýdan azat etýde qurban bolǵan jerlesterimizge arnalǵan bul eskertkish-kitap erekshe mánge ıe. Qymbat jádigerimizde Aqmola oblysynyń qazirgi ákimshilik aýmaǵynan Uly Otan soǵysy jyldary qan maıdanǵa attanǵan jaýyngerlerdiń tizimi qala men aýdandar boıynsha jeke-jeke usynylmaqshy. Qazirgi kúni árbir aýdan málimetter jınaý jóninde ózderine júktelgen tapsyrmany aıaqtaýǵa taıaý ekenin oblystyq ardagerler keńesiniń tóraǵasy Shapaı Ábýtálipov aıtyp otyr. – Biz jeńis úshin jaý­men aıqasqan aǵa urpaqtyń, ajal qushqan aǵalarymyz ben apa­larymyzdyń rýhy aldynda máńgilik qaryzdarmyz. Batyr­larymyzdyń erligi bizder úshin árqashan úlgi-ónege. Bul erlik óskeleń urpaqtyń jadynda máńgilik jattalyp qalýy úshin qoǵam bolyp jumyla jumys isteýimiz kerek. Osy basylymdy 1000 danamen shyǵaryp, Kókshetaý, Stepnogor qalalary men oblystyń árbir aýdandarynyń mektepterine, kitaphanalaryna, mýzeıler men ardagerler uıymdaryna tartý etpekpiz, – deıdi Shapaı Mú­tállapuly. Oblystyq ardagerler uıy­mynyń málimeti boıynsha, ke­zinde Kókshetaý oblysynan 100 myńǵa jýyq adam soǵysqa attanǵan. Qazir oblysta 103 myń zeınetker bar. Onyń 228-i Uly Otan soǵysynyń ardageri bolsa, 72-si  Kókshetaý qalasynda turady. Tizimge alynǵandardyń barlyǵynyń esimi jańa kitapqa enetin bolady. Eger sýretteri bolsa, tipti jaqsy. Soǵysqa basqa jerden shaqyrylyp, biraq keıin belgili bir sebeptermen bizdiń oblysqa qonys aýdarǵan ardagerlerdiń aty-jónderin de kitapqa engizý máselesi umyt qalmaıdy. Sondyqtan, Shapaı Ábýtálipov turǵylyqty meken-jaılary boıynsha Kók­shetaý, Stepnogor qalalary men aýdan turǵyndarynan soǵysqa qatysqan ata-babalarynyń aty-jónderin naqtylaýdy ótindi. Ol úshin qalalyq, aýdandyq ardagerler keńesi men áskerı komıssarıatqa habarlasýlary kerek. Al, jalpy, osy aıdan bas­tap aýdandardan tizimder surala bastaıdy. «Bozdaqtar» 1941-1945 jyl­dardaǵy Uly Otan soǵysynda qaza tapqan jaýyngerler týraly eki tomdyq eskertkish-kitap burynǵy Kókshetaý oblysy kezinde, 1996 jyly jaryq kórgen bolatyn. Endi 3 tomdyq bolyp shyǵatyn qymbat jádiger sáýir aıynda jaryq kórmek. Bul basylymda maıdan dalasynda qaza tapqan barlyq jaýyngerlerdiń esimi jazylady. Jarqyn tarıhtyń jasampaz betterin jazýǵa soǵys arda­gerlerimen birge tyl eńbek­kerleri de aıryqsha úles qos­qany belgili. Sondyqtan, tyń ıgerý naýqanyna belsene qa­tysqan birqatar eńbek arda­gerleriniń esimderin atalǵan kitapqa engizý múmkindikteri qarastyrylýda. Baqbergen AMALBEK,  «Egemen Qazaqstan». Aqmola oblysy.